Quería comezar con algo gracioso ou interesante, pero non se me ocorría nada. Así que entrei na Wikipedia: “A filloa é denominada polos franceses co nome de crêpe”. Está claro. A Wikipedia non ten nin puta idea.
Este doce típico do entroido entra ben en calquera momento do ano. E aínda que en cada casa se fan diferentes e as mellores sempre son as da avoa, ninguén vai rexeitar a filloa do seu achegado, como predica a Biblia (creo que era algo así, non a lin).
Ingredientes
- 0.25 L de leite
- 4 ovos
- 0.25 L de auga
- 200 g de fariña
- Un chisco de sal
- Unha cullerada de manteiga
- Un pouco de reladura de limón ben finiña
- Unto
- Azucre
Elaboración:
- Peneiramos a fariña sobre un bol e engadimos o sal.
- Batemos ben os ovos e mesturamos co leite, a auga, a manteiga derretida e o limón.
- Vertemos sobre a fariña lentamente mentres removemos ben, eliminando os grumos.
- A mestura (“Amoado”) debe quedar máis líquida ca espesa.
- Deixamos repousar por media/unha hora na neveira.
- Poñemos unha tixola grande ao lume, e cando estea ben quente, pintámola co unto e baixamos un chisco a temperatura.
- Cun cullerón deitamos o amoado na tixola mentres facemos un movemento circular coa frixideira.
- Cando despeguen os bordos, darlle a volta e facer por uns segundos máis.
- Retirar e esparexer un pouco de azucre por riba.
- De cando en vez, volver empregar o unto, a fin de que non se peguen.
Non esquezas…
Que aínda que soas están boísimas, acompañadas mesmo melloran: cun chisco de azucre, mel, marmelada, nocilla ou até recheas de crema pasteleira ou de chocolate.
Receita de: OK Diario, o xornal galego por antonomasia
As Receitas do Artur 