Fígado Encebolado

– Doctor, dóeme o fígado.
+ A ver, saque a lingua.
– Pero se o que me doe é o fígado!
+ Pois logo saca o fígado e déixateme de lerias!

Nesta páxina tedes chistes de fígados tan hilarantes que non fun quen de escoller un.

Xa ía sendo hora de pechar o arco de receitas vexetarianas neste blogue. Ou será? Non podería ser vexetariano o fígado? Ao igual que os ovos ou o leite animal, vaia. Explícome, o fígado é un órgano que se pode rexenerar por completo aínda que lle saques un cacho. Entón, mediante unha operación mínimamente invasiva e intentando que o animal non sufrise en absoluto, podería obterse un cacho de fígado e sería vexetariano, non? Teoricamente falando podería ser un produto animal que non implicase mancar ao animal. Dá que pensar…

Tamén quero comentar que cando busquei en google Fígado Encebolado, o primeiro que me aparecía eran receitas brasileiras. Outra vez o apaixonante mundo da lusofonía sorprendéndonos cando menos o esperamos.

Ingredientes (para 2):

• 400g de fígado (ou medio quilo se estades con fame)
• 1 cebola
• O zume de medio limón
• Un chorro de viño branco
• Allo
• Aceite
• Sal e pementa

Elaboración:

1. Tras limpar o fígado e secalo ben, salpimentamos os filetes de fígado e botamos por riba allo picado.
2. Nunha tixola a lume medio refogamos a cebola cortada en tiras por uns 10 minutos.
3. Reservamos a cebola e na tixola douramos o fígado (en 2 tandas se é moito). Isto máis ou menos 5 minutos, pero é cousa rápida, pois se o cociñamos moito pode ficar duro.
4. Reincorporamos a cebola e botamos o viño e o limón, deixando que evapore o alcohol. Dependendo de se queremos que quede con máis salsiña ou menos, poderiamos botar máis viño ou medio vasiño de auga ou de caldo. E tamén controlar canto o reducimos.
5. Só quedaría servilo co acompañamento da nosa preferencia (patacas cocidas, patacas asadas, puré de patacas…).

Non esquezas que…

Esta receita ten un millón de variacións. Dende os detalles máis sutís a cambios que a desfiguran completamente. Así que síntete libre de non seguir a miña receita, pois eu tampouco o fixen. Por exemplo podes picar un pouco xenxibre xunto co allo. Ou usar vinho do Porto…

De bonus déixovos esta receita só polo xeito de expresarse que ten a persoa que a redactou, co que me sentín un tanto identificado, pois plasmou os pensamentos que lle pasaban pola cabeza ao escribila.