Empanada de Mexillóns do Aarón

Aarón é un rapaz que estuda cine. Aarón é unha persoa que non se conforma con nada. Por iso, el sabe que non vai rematar traballando de camareiro: Aarón sabe que ten un posto asegurado na cociña.

Esta receita, se ben é longa, merece a pena. É ideal para levar a rodaxes, e que todos che digan o ben que che saiu. Ademais, enche moito máis do que parece!

Ingredientes para a Masa:

• 300g de fariña (e logo a ollo)
• 100cl de auga
• 100cl de aceite
• Sal
• 6g de lévedo (ou 12g se fose fresco)
• A xema dun ovo

Ingredientes para o Recheo:

• 1 Cebola grande
• 1 Pemento vermello grande
• 1 Cenoria grande
• 2 ovos duros
• 2-3 latas de mexillóns
• Aceite, sal, pementa, pimentón picante e doce
• 5 culleradas de tomate fritido (a ollo)
• 1 lata de atún

---

Elaboración:

Facemos a MASA:

1. Nun bol, mesturamos a fariña, o lévedo e o sal.
2. Engadimos a auga e o aceite e remexemos cunha culler.
3. Amasamos facendo coma que somos un panadeiro profesional e temos moita idea (ver clip ao final desta publicación para inspiración).
4. Deixamos levedar por unha hora cuberto por un pano. Mentres…

Cociñamos o RECHEO:

1. Poñemos a cocer os ovos.
2. Picamos ben a cebola, o pemento e a cenoria.
3. Sofriximos a cebola.
4. Engadimos a cenoria e o pemento co sal até que abranden.
5. Agregamos o tomate fritido.
6. Botamos o ovo picadiño, os mexillóns e o atún. Condimentamos coa pementa e os pementóns.
7. Unha vez ben mesturado e cociñado todo, podemos retirar do lume. Agora…

Montamos a EMPANADA:

1. Dividimos a masa en 2 e estendemos cada porción coa axuda dun rolete.
2. Prequecemos o forno.
3. Poñemos unha das láminas de masa na bandexa do forno. Botamos o recheo enriba e tapamos coa outra.
4. Pechamos ben dobrando o bordo da capa inferior sobre a superior e rematamos coa axuda dun garfo.
5. Facemos un burato no centro da lámina de masa superior. Poñémoslle fantasía (as tiras estas por riba facendo algunha forma).
6. Pintamos coa xema.
7. Metemos ao forno até que doure (non demasiado, que queima).

Velaquí un gif coa técnica de amasado. Por 0,99€ podes acceder ao vídeo completo de un minuto, con audio incluído.