Vichyssoise

Por que os franceses comen caracois? Porque non lles gusta a comida rápida. E porque son todos parvos.

Esta receita, fresca e ideal para o verán, debe o seu nome á cidade de Vichy, capital da democracia. E a súa branca cor débese ao amor dos gabachos por este pigmento.

Ingredientes:

• 4 porros (só empregaremos a parte branca)
• 1 cebola
• 3 patacas
• Caldo de ave, vexetal ou auga
• Unha noz de manteiga
• Sal e pementa
• 100ml de tona ou leite

Elaboración:

1. Limpamos ben os porros (eu ábroos parcialmente cun corte lonxitudinal que comeza algo por debaixo do verde). Retiramos as partes verdes, que podemos empregar noutro prato coma unha sopa.
2. Cortamos os porros, as patacas e a cebola.
3. Nunha pota a lume baixo refogamos a cebola e os porros cun pouco de aceite (ou manteiga).
4. Cando abranden, engadimos as patacas e salpimentamos, refogando o conxunto.
5. Agora cubrimos co líquido escollido e cocemos por uns 20 minutos.
6. Pasado ese tempo, retiramos unha parte do líquido, que reservamos por se queda espesa de máis.
7. Vertemos o leite ou tona e batemos.
8. Por último introducimos na neveira para que arrefríe.

Non esquezas…

Que cando fagas cremas con pataca, non as cortes: mellor que as “chasques”. Isto é, para cortar un pedazo introduce o coitelo ata a metade do camiño. Despois arranca o trozo facendo panca co propio utensilio. Isto faise deste xeito para que libere máis amidón.