Certamente existen un monte de receitas con cuscús similares a esta. Pero é todo casualidade, pois esta é froito da máis absoluta xenialidade.
É dicir, estabamos en casa con pouco tempo e con moitas verduras que había que comer. Mesturamos todo e máis e saíu isto. Xa lles gustaría aos chefs ter esta inspiración divina e capacidade creativa de meu pai.
Ingredientes:
- Couscous
- Cebola
- Pemento
- Tomate (se son tomates cherry queda aínda mellor)
- Cabaciña
- Cenoria
- Uvas pasas
- Herba luísa
- Curry
- Pementa
- Salsa de soia
- Salsa de peixe (se non dispós dalgunha destas salsas non pasa nada, non leva grandes cantidades delas)
Elaboración:
- Nun wok (ou nunha pota) sofriximos a cebola.
- Engadimos as verduras cortadas e as uvas.
- Agora esparexemos un pouco de pementa, curry e herba luísa ou herba limón. Vertemos tamén un chorriño de cada salsa (non moito que son fortes). Se non temos ningunha, un chisco de sal.
- Cando estea rematando de cociñarse, facemos o cuscús nun bol. Normalmente botariamos a mesma cantidade de sémola que de auga, mais imos usar menos líquido, e así rematará de facerse co do pisto.
- Por último, engadimos o cuscús ao wok, remexemos e nun minutiño retiramos.
As Receitas do Artur 