Lentellas

Lentellas: ou as tomas ou as tomas, porque se as deixas virá un elfo rosa a castigarche por semellante pecado. Este ser de luz farache comer lentellas polo resto da túa triste e deprimente vida (ou até que rebentes).

Esta comida entra soa no inverno, e é ben máis sinxela do que pensas. Mais antes de comezar debo advertirche: aínda que se venden en bolsas de un quilo, por moi tentador que resulte, non fagas a bolsa enteira. E para nada estou falando dende a miña propia experiencia hehe.

Ingredientes:

• 1/2 quilo de Lentellas
• 2 cenorias
• 1 cebola pequena e un par de dentes de allo
• 1 pataca grande
• 1 tomate
• Aceite, sal, pementa e unha folla de loureiro
• Un pack de chourizo+morcilla+touciño entrefebrado que venden nos supers (ou só chourizo se prefires)

Elaboración:

1. Poñemos as lentellas a remollo polo menos unha hora.
2. Mentres están a remollo, podemos ir cortando en rodas as cenorias e a carne, e picando cebola, allo e tomate. A pataca chascarémola, coma explico na publicación da Vichyssoisse.
3. Na pota onde vaiamos cociñar, sofriximos a lume non moi alto a cebola, allo, cenoria e o touciño por algo máis de 5 minutos. Engadimos o tomate e salpimentamos.
4. Agora, tras enxugar as lentellas, podemos engadilas (co loureiro). Cubrimos de seguido con abondosa auga e imos preparalas a lume lento, removendo de vez en cando para evitar que se peguen ao fondo e arruinen todo.
5. Pasados 5-10 minutos, botamos a pataca e o resto da carne, e seguimos cociñando (coa tapa posta sempre). Seguimos remexendo a intervalos até que estean brandas ou ao noso gusto.

Non esquezas que…

Hai mil e unha receitas de lentellas, e eu non seguín ningunha das que vin. Así que non te sintas mal se non as pos moito tempo a remollo, se lles queres botar arroz, pemento, menos carne, outras especias…

Por último (e esperemos que nunca o precises), se notas que se están pegando, sácaas rápido do lume e corta a cocción poñendo a pota sobre un pano mollado (ou no fregadeiro con auga). Despois podes seguir cociñándoas, pero moito ollo, que non se volvan pegar!!