Sabías que o millo é moi bo para a memoria?? Merda. Creo que xa contei este chiste. Veña, pois conto outro: Sabes cal é o meu prato favorito? O fondo. Que? Pensabas que ía contar algo relacionado co millo? Pois non. E non é porque non se me ocorran, é porque non me da a gana.
Aposto o que sexa a que non soes cear isto. E probablemente pasases ao seu lado no supermercado miles de veces sen te fixar. Pois ben, creo que non hai cea máis rápida, sinxela e rica!
Ingredientes:
- Espiga de millo precociñada
- Manteiga ou queixo de Arzúa
- Sal
Primeira Elaboración (tan sinxela que se fai soa):
- Sacamos a espiga da bolsa e procedemos a cociñala. Temos tres opcións: á prancha, cocida ou a máis sinxela:
- Introducimos a espiga no microondas, cuberta con manteiga ou queixo e cun chisco de sal. Quentamos por 3 minutos (ou o que indique o paquete) e xa está listo!
Segunda Elaboración (segue sendo sinxela pero parece máis elaborada):
- Nunha pota con auga fervendo metemos o millo e un chisco de sal por uns minutos.
- Sacámola e cubrímola con queixo ou manteiga e listo!
Terceira Elaboración (sinxela pero xa a podes atopar en restaurantes):
- Poñemos ao lume unha prancha (ou tixola), cando queza, botamos un chisco de manteiga (ou aceite) e o millo con sal, que iremos xirando para que se faga ben.
- Non te preocupes por que torre un chisco, e se prefires, podes partir a espiga en 2 ou 3 e facer cachos máis xeitosos. Tamén é posible facelo ao forno.
Non esquezas…
Que comela non ten moita ciencia: cóllela coas túas mans e a dentadas! (Non recomendable para persoas con aparato dental).
As Receitas do Artur 