Gazpacho

Mira, non vou facer chistes de andaluces, porque a estas horas estarán durmindo a sesta. E o mínimo é que se poidan defender, non?

Como hai medio millón de receitas de Gazpacho, e en verdade todo se limita a coller os ingredientes e trituralos, nesta publicación recollerei varios consellos á hora de facer un bo gazpacho.

Ingredientes :

• 1 kg de tomates pera maduriños
• 1 cogombro
• 1 pemento verde italiano (ou medio)
• 1/2 dente de allo
• Unha rebanda de pan branco (opcional)
• 50ml de aceite (aove)
• 30ml de vinagre (a poder ser bo)
• Un chisco de sal
• Auga (opcional, se o queres beber nun vaso)
• 1 cebola tenra ou 1/4 de cebola (opcional e controvertido)
• Zume de limón (opcional)

Consellos:

1. Uns bos tomates son vitales nesta receita, por iso os escollidos nos ingredientes (e mellor que non estivesen na neveira, que estraga a súa textura).
2. Non abusar do allo e o pemento: o importante é o tomate e despois o cogombro.
3. Se o cogombro che resulta pouco dixestivo, pélao e déixao con sal sobre un colador como mínimo media hora.
4. Se queres un gazpacho finiño, podes pelar o tomate e retirar as sementes (que logo podes aproveitar nunhas deliciosas torradas). Para pelalos é só escaldalos uns segundos en auga fervendo e a pela sae soa.
5. Para potenciar o sabor, deixa as verduras cortadas macerando co sal, vinagre e un chisco do aceite durante unhas horas ou o día enteiro (para iso mételo todo nun bol e cubres con film). Podes sacar o allo e mesmo o pemento para facelo máis dixerible.
6. Vai engadindo o aceite pouco a pouco mentres trituras para que emulsione.
7. Deixa que arrefeza na neveira por unhas horas antes de servir, nada de botarlle xeo.