Arroz con Algas e Cogumelos

Dúas algas conversando:
– Meu marido é un durmiñón! Chega á casa e xa corre para a cama!
E a outra:
– Pois meu todo o contrario… El non vai durmir sen facer algo😳!

Pois ao final si que conseguín publicar a tempo. Para nada escribín isto o martes pola mañá.

Non é que estea volvendo ao arco vegano do blogue, pero tamén hai que ter contento a todo o público. Para a xente normal, podedes botarlle un pouco de polo e listo. Ou cambiar as algas por salchichas, os cogumelos por ovos e as verduras por salsa de tomate.

Ingredientes:

• 20-30g de algas deshidratadas (quería hiziki pero non había, así que empreguei espaguete de mar).
• Caneca e media de arroz integral (ou o que che preste).
• 1 cenoria
• 1/4 cebola
• 1 allo
• 1 pedazo de xenxibre
• 300g de cogumelos

Elaboración:

1. Hidratamos as algas do xeito que indique no paquete. Mentras imos cocendo o arroz cun chisco de sal (se precisades que explique máis este paso, poñede aí un comentario ou que sei eu). O integral que merquei eu levoulle uns 45min, só aviso para que xestionedes o voso tempo.
2. Picamos ben fino todas as verduras e cortamos en dadiños os cogumelos.
3. Sofritimos no wok (ou se non somos o sufientemente guais como para ter un, pois unha tixola) as verduras por uns minutos, engadindo despois os cogumelos.
4. Se as algas quedan moi grandes podemos cortalas. Engadímolas co arroz ao wok, salteamos e podemos botar un vasiño de auga/caldo/auga de rehidratar as algas.

Non esquezas que…

Esta é unha das miles de receitas que hai con ingredientes similares coma o arroz con algas e berberechos. Ou variando e engadindo ingredientes: uvas pasas, piñóns, porros, luras…