Shitake á Feira

A mamá polbo ao seu fillo:
-Imos cruzar a estrada: dáme a man, dáme a man, dáme a man, dáme a man, dáme a man, dáme a man, dáme a man, dáme a man.

Esta receita está moi ben. Non tan ben coma o polbo á feira, pero a textura é bastante similar. O sabor non tanto, pero algo é algo. Así que se es vegano ou o polbo está moi caro ou só precisas un par de racións: eis a solución perfecta!

Ingredientes:

• 200g de shitake
• 4 patacas
• 1 folla de loureiro
• 1 cullerada de Wakame
• 1 cullerada de algas Nori
• Aceite
• Sal groso
• Pimentón picante e doce

Elaboración:

1. O primeiro é poñer a ferver auga coas algas e o loureiro. Mentres limpamos as patacas e cortámolas (non as pelamos). Os shitake tamén podemos partilos para que teñan todos un tamaño uniforme.
2. Cando rompa a ferver, botamos os cogumelos. Podemos botar tamén as patacas, ou cocelas noutra pota mentres tanto.
3. Retiramos, intentando separar as algas. Servímolo nun prato e cubrimos con pimentón, sal e aceite abondosos.

Non esquezas…

Limpar ben o prato cun bo cacho de pan. Esta receita admite múltiples variacións, dende os ingredientes (hai quen tamén ferve media cebola ou outras algas) até o método: podemos retirar as algas antes de meter os cogumelos para que sexa máis sinxelo todo.